Siva digl 1946 infurmescha La Pagina da Surmeir sur dad evenimaints regiunals an Surmeir. Fundada dalla «Uniun rumantscha da Surmeir» (URS) presta ella ena contribuziun impurtanta pigl mantignamaint digl lungatg rumantsch e per la diversitad mediala aint igl cantun Grischun.
Cun en abunamaint u en inserat ainten la «Pagina» davantez Vous ena part digl noss angaschamaint per ena diversitad linguistica e mediala.
Abunamaints InseratsScu gasetta regiunala dat la Pagina da Surmeir er en’igleida sen tgossas tgi oters na veian betg.
Savens ans pertotgan las piculezzas igl pi fitg ed igl pi direct. Nous ans focussagn sen evenimaints locals e sen fatgs ordvart igl interess dallas grondas medias. Igls noss artetgels cumpeglian ena largia purscheida da temas e sa fatschaintan er cugls detagls. Cunchegl ischan nous ena part impurtanta ainten en mond da medias diversifitgia e cumplessiv. Notabene an rumantsch.
Cun en abunamaint pudez Vous mintga gievgia far en plascheir a sasez u ad ensatgi oter.
52 ediziuns
52 ediziuns
En inserat ainten la Pagina da Surmeir è ena situaziun classica da win-win. Vous profitez dalla reclama. An madem mument sustignez Vous la suletta gasetta rumantscha da Surmeir.
Las indicaziuns tecnicas e las tariffas actualas cattez Vous aint igl figl d’infurmaziun.
Inserats pigl «Mittelbündner Kombi» (Pagina da Surmeir + Novitads + Pöstli) succedan sur igl portal dalla Somedia.
Inserats angal ainten la Pagina da Surmeir Pudez tarmetter ad info@paginadasurmeir.ch
La Pagina da Surmeir è igl organ da publicaziun per la regiun Alvra, per cumegns, per las pleivs e per uniuns e societads da Surmeir. L’editoura dalla gasetta è l’Uniun rumantscha da Surmeir (URS). Ella è neida fundada igls 09-10-1919 a Savognin e veva la fegnameira da mantigneir e promover la cultura e tradiziun digl pievel rumantsch surmiran e lour diever an famiglia, scola, baselgia, medias, administraziun e veta da mintgade. Igls 06-06-1946 è cumpareida l’amprema Pagina da Surmeir. Davent dall’antschatta è l’URS l’editoura dalla gasetta surmirana. Igls 20-06-2006 ò l’URS surdo las incumbensas dalla promoziun digl rumantsch surmiran alla nov fundada Uniun rumantscha Grischun Central (URGC). Siva da chel onn è l’URS angal anc responsabla per l’ediziun dalla nossa gasetta ed ò nignas otras incumbensas ple.
Commembras/Commembers dall'URS èn persungas naturalas e giuridicas scu er instanzas publicas, tgi èn abunent/as dalla Pagina da Surmeir.
Alla suprastanza fon part:
Gian Sonder, Salouf (president); Flavia Balzer, Alvaschagn (vicepresidenta); Daniel Dedual, Tinizong (actuar); Giancarlo Lozza, Coira (cassier); Sandra Baltermia-Guetg, Salouf (assessoura).
La redacziun per La Pagina da Surmeir fò la nova Fundaziun Medias Rumantschas (FMR). Chella fundaziun, finanztgeida cumplagnamaintg da cantun e Confederaziun, exista siva digl onn 2020. Sia fegnameira è da promover il pled schurnalistic scretg an lungatg rumantsch, an tot igls idioms scu er an rumantsch grischun.
Per cuntanscher chella fegnameira collaborescha la FMR cun divers partenaris tgi edeschan mediums rumantschs. Ella è uscheia realisatoura principala da cuntigns medials an furma scretga surtot per las gasettas La Quotidiana, Posta Ladina e La Pagina da Surmeir. Dasperas collaborescha la FMR er stretgamaintg cun RTR.
Siva dall’antschatta digl onn 2021 realisescha la FMR dad A-Z er La Pagina da Surmeir. Vot deir tg’ella coordinescha e decida las tematicas, ella screiva igls texts, ella furnescha las fotografias, redigia, lectorescha e currigia igls texts e procura alla fegn er per l’impaginaziun anfignen tar igl «bung per stampa». Per La Pagina da Surmeir screiva ella an amprema lengia aint igl idiom surmiran, singuls texts cumparan er an rumantsch grischun. Editoura dalla gasetta è l’Uniun Rumantscha da Surmeir (URS), la quala ò ena cunvignientscha da prestaziun cun la FMR.
Igl cunsegl da fundaziun dalla FMR sa cumpona actualmaintg da Corina Casanova (presidenta), Rico Valär (vicepresident) e digls ulteriours commembers Barbara Janom Steiner, Aurelio Casanova e Carl Hassler.
L’antiera redacziun dalla FMR sa cumpona da passa ena tozza collaboratouras e collaboratours rasos sur igl antier cantun Grischun. Il schefredactour è David Truttmann da Coira/Müstair. Actualmaintg lavouran tar la FMR las suandontas persunas da Surmeir: Madlaina Capeder Sonder, Sandra Balzer e Tanja Jäger. Sustignias vignan els da singuls collaboratours libers e da lour collegas dall’antiera redacziun dalla FMR.
Gugent retschavagn nous impuls, dumondas u er cumplimaints. Lasche ans saveir!